ENDRIK’S COLUMN

ZUPE

Onze burhervaoder ei van ’t behin of an z’n eihe druk emaekt over ’t drankhebruuk van de jeugd. Ie staet dan ok eêmae achter de actie Lae ze nie (ver)zupe. In de gemeênte ei ‘n brief estierd an de jeugd van twaolve tot vuuftiene. Die wier uut’enoôdigd vô ’n aevend in Renisse. In wat vô zô’n aevend eêl onhebrukelijk is: zonder alcohol. Noe was t’r ’n moeder van zô’n joôn van twaolve in die wier aarg boôs. Je mot gin slaepende onden wakker maeke, zei ze. Kiek, dae luste de slaepende onden gin broôd van. Ik dienke, dat die moeder de beste bedoeliengen eit, mâ toch maek ze volhes mien drie groôte fouten. Ze ei, om te behinnen, d’r zeune van twaolve verheleke mit z’n broer van vuuftiene, die nog nie an stappen toe is. Ze gaet ‘r van uut, dat broer van twaolve dust net zô zoete tuus wil bluve. Aole ouwers mit meer kinders wete dat ze aomè verschillend bin. Dust as groôte broer nog nie an stappen in drienken toe is, zeit dat nog niks. De aore kinders zouwe misschien best vroeher wille behinne. Moeder dienk ok, dat eur zeune ’n open boek vô d’r is. Noe, dat kan best weze, mâ as joengers twaolve bin laete ze van dat open boek toch nie aole stikken an d’ouwers leze. In dat is mâ goed ok. In de leste fout is, dat ze dienkt dat de gemeênte aole uus’ouwes kent in weet oe of ’t dae toehaet. Dat kan netuurlijk nie. M’n è ier gelokkig nog nie “big brother”, â most ik ‘r indertied bie Wullum Stouten even an dienke, toe dat ’n groôte plannen ao mit de vuulcontainers. De gemeênte mot ’t doe mit ciefers van de previnsie. In daer bliek uut, dat ‘r toch vees te vee kinders tussen de twaolve in vuuftiene zupe. Dat zou je ok kunne wete van de tillevisie, want dae ‘oôrde m’n â dikkels deskundihen, dokters in ’n zieken’uus bevobbeld, die zukke jeugd in coma binne kriegt.
Burhervaoder Gerard mot dust toch mâ gewoon zô dû bluve gae. In daebie bedienke, dat ’t onmohelijk is om aole maansen tevree te laete wezen.

bron: Ons Eiland  24-05-2012