ENDRIK’S COLUMN

Vuulte

Wat bin wulder noe toch wî blie, é. In deze moelijke crisistieden kriehe m’n zômâ ‘n baelezak mit euro’s trug, want ’t verwaarken van ons ofval gae tehenwoordig zôvee beter as vroeher, dat ’t goekoaper is. Dust ons è aomè tevee betaeld in die wet’ouwers van Schouwen-Duveland bin zô eerlijk, ze wille ’t nie bewaere vô slechtere tieden. Ze geve de centen trug an de burhers. Maansen, m’n ‘ore ier op ’t eiland gewoon gebutterd in gesukerd. 
In oe komt ’t noe toch dâ’k ’t nie eêmae vertrouwe? Dat is de schuld van wet’ouwer Stouten. Je wete wè, die è’k â ’s eerder Wullum de Snuffelaer genoemd, want ie wou in de ofvalbakken laete snuffele of dat ‘r toch wè ’t goeie ofval in zat. Ik è behrepe, dat ’n dat nie in dank is of’enome in dat ’t snuffelen dû de gemeênteraed is of’eblaeze. Mâ jao, Wullum is ’n vol’ouwer. Ie ei emorke, dat Endrik eêl oneerlijk is. Want kiek, die groene emmer vô de vuulte van ’t of is nie zô groot. Meêstentieds is ’n net groôt genocht vô de vuulte die â je in twî weken verzaemeld eit. Mâ d’r bin tieden, dan ei je d’r nie genocht an. In dan loape wulder eêl rap mit ’n twidde laedieng naer ’n plekke waer of de ofvalwaehen nog nie geweest is. Endrik docht dat ’n d’n eênigsten was die zô dee, mâ gelokkig bin d’r meer van die lillijkerds. In dan is ’t aneêns vee minder aarg. Mâ de wet’ouwer wil nie bie d’n beer edaen ‘ore. In net noe ’t naejaer de burhers zôvee ofval bezurgt maekt de wet’ouwer bekend dat‘n ’n chip op de ofvalbakken wil laete zette. In mit zô’n medèrn dienk weet de ofvalwaehen glieke, dat de bak die dag â leeg emaekt is. In dan bin je d’r bie. Je behriep wè, noe vind’ik Wullum aneêns nie zô aordig mî. Want noe mot ik eêmae naer Plan Tureluur rieje om daer de rotzoo te mieteren. In dan stae ’t Zeêuws Landschap in de Vohelwacht op ulder achterste beênen. Mâ jao, ’n aarm maans mot toch wat, é.                                        (bie d’n beer doe: bedriegen) bron: Ons Eiland  27-10-2011