ENDRIK’S COLUMN

Partijen

D’r is niks zô onheloafwaerdig as de landelijke polletiek. Dat è m’n wî kunne zie mit de zaek van Mauro, die van Wilders nie in ons landje mag bluve. In dust ok nie van de VVD. Bie ’t CDA dee ‘t ‘r om spanne. Want d’r waere twî maansen, die of ulder rik rechte wouwe ‘ouwe in nie mit de partij mee zouwe stemme. Uuteindelienge bin ze overg’aeld, want de partij zâ gae onderzoeke oe of aol die Mauro’s in de toekomst ier kunne bluve. Noe, zô’n onderzoek kâ je moôi vertraehe,ze zû nie uutvaere mit lummieren. Ze kunne ’t CDA dust noe beter de PUB gae noeme: Partij van Uuthestelde Barm’artig’eid. ’t Was jammer, dat Bea Flach nog even most zaahe, dat van eur Mauro ok weg most. Dat ao ze beter nie kunne doe. Want Endrik was noe net van gedachte dat ’t ier op ’t eiland nog wè meevaolt mit die raore partijpolletieke fertuten. Ze wille ier nog wè wat bereike mit z’n aolen. Dat kô je ok eêl goed maarke bie de behroôtiengsverhaederienge, want ’t was daer aomè ouwejongeskrentebroôd. ’t Liekent wè of dat ‘r ier eên eilandkabinet zit wat of kan besture zonder partijen. In dat mô m’n toch ok nie è, want zonder partijen bin de amtenaeren de baes. 
’t Is mien op’evaole, dat wet’ouwer Stouten de eilandgeschiedenis goed kent, want ie wou ’t zaalfde perbeere as in ’t varre verleden wet’ouwer Veer’oek gereheld dee in wae de raed toe nog â ’s intrapte. Die kwam dikkels op ’t aolderleste mit ’n voôrstel dat eêl gauw an’enomen most ‘ore, want anders krehe m’n gin subsidie mî. ’t Was jammer vô Wullum, mâ ’t feêst gieng noe nie dû.
Neênt, ons motte toch mâ de partijen ‘ouwe. Misschien net as ’t CDA mit ’n aore naem. LSD mot mâ LZD ‘ore, Leefbaer Zonder Drammers, want ze vinde de maansen die tehen de windmolens op Duveland bin mâ niks. Zukke protesten mô je van taefel veehe. In dan ‘oort ons eiland ok glieke vee leefbaerder, dat behriep je wè. Ik kan aest nie wachte op verkieziengen.
(mit lummieren: heel vroeg als ’t licht wordt.) bron: Ons Eiland  08-12-2011