ENDRIK’S COLUMN

VOORUUT KIEKE

Noe è’k toch in de krante eleze, dat de gemeênte gae waarke mit de BGT, de Basisregistratie Grootschalige Topografie. Aoles wat wulder as burher an ons uus of in ons ‘of te staen è ‘oor op’eschreve. Dat kun ze vanuut de locht op de foto zette. Ze gae dat eêl percies bie’ouwe, want amtenaeren motte wat te doen è. Ik wete nie waalke wet’ouwer dat in z’n portefulje eit, mâ ik dienke netuurlijk ’t eêste an Stouten, want die è’k â ’s Wullum de Snuffelaer enoemd toe dat ’n onze vuulnisemmers gieng onderzoeke. In dienkt’r an, dat de gemeênte mit de BGT z’n eihe goed as Big Brother kan gae gedraehe. Ze doe net of dat ’t vô d’r eihe waark is, want ze kun dan beter zie of ulder groen ’t wè goed doet in waer of t’r wat mot gebeure. Mâ twint kun ze ok aoles in ons ‘of bekieke. In dae kun ze an verdiene, ô. Staet ‘r misschien ’n kotje waer of gin verhunnieng vô evrohen is? Trek kriehe m’n nog bericht dat wulder motte betaele vô de veuhelkotjes in voertaefels. Dae bin d’r op ’t eiland eêl vee van. As ze die gae taale komme ze in de verleidieng om vô aalk kotje €10 te vraehen. Dae kâ je wî as gemeênte leutihe diengen vô doe.
Endrik ei jaeren elee van z’n kolenbaarhieng ’n blombak emaekt zonder te vraehen of ’t wè mocht. Dae zit ik noe toch ’n bitje mee, ik wete nie of ik kommende nacht wè goed zâ slaepe. Maansen, kiek nog ’s goed nae aole kotten in knippen bie j’n uus. Trek kom t’r eêne an de deure om van dichtebie te kieken. Dan leit ‘r ’n weke laeter ’n rekenienge in de busse. Jao, de gemeênte kiek vooruut. Je zou dat nie g’loave as je dienkt an ’t distributiecentrum in Zurrikzeê, mâ op pepier wete ze ’t moôi te zaahen in ulder Tij voor de Toekomst. Noe ik d’r an trugdienke, ik è dae nie in eleze, dat ze in 2040 de burhers beter wille controlere. Of zouwe ze in ’t gemeênt’uus twî Tijen vô de Toekomst gebruke?

bron: Ons Eiland  06-09-2012