ENDRIK’S COLUMN

VISIE

OJulder wete zô zachjes an wè dat Endrik de polletiek nie aarg oahe eit. Â je dat noe wî ziet in Den Aeg waer of de oagste maansen van ’t CDA ophelucht è loshelaete wat ze ’n aolf jaer geleeje mit vier verdedigde, dan krieg je dae toch piene in je buuk van. In mâ zwaoie in draoie in nog dienke dat wulder ’n groôt vertrouwen bluve ouwe. In over ’n aolf jaer mit de verkieziengen kaarme dat de burhers zô onverschillig bin in zô makkelijk wegbluve. Ier op ’t eiland vaol ’t aomè nog wè mee. De wet’ouwers è gelok, dat de raed eêl vreêdzaem is in ’t ze nie moelijk maekt. Ze kriehe noe zaalfs zôvee praetjes, dat ze durve te zaahen dat de raedsleden gin visie genocht è. Ze motte d’r eihe meer mit de groôte zaeken bezig’ouwe in nie mit aalke klapschete. Dat krieg je d’r noe van â je as raed te meehaend bin.
Bie ’t woord “visie” spriengt bie mien aoltied ’n stik van m’n kiezen, ik dienke van ’t tandenknarsen. Want jaeren elee, toe dat Schouwen-Duveland nog vier wet’ouwers ao, waere d’r drie mit visie in eêne was zô dikkels bie de burhers dat ze gin tied vô visie ao. In toe è die drie mit visie nommer viere an de kant ezet. Ik wille nie zaahe, dat die drie slecht ulder waark deeje. Ik dienke alleênig, dat aalke wet’ouwer ’n eihe portefulje eit in dat ’t dan varre gaet â je ’n colleha d’r uut waarkt. Je mot daebie bedienke, dat die visie neffen goeie zaeken ons ok ’n gemeênt’uus ebrocht eit, dat vô deze gemeênte vees te diere is. Dat ‘oor netuurlijk aoltied tehen’esproke, mâ ’t is wè zô.
De burhers verwachte van de raedsleden dat ze wet’ouwers an d’r jasje trekke as t’r wat is wat of ze nie anstaet. 
In dae gaet ’t zeer doe. Want as ’t oekje om ’t stroôtje komt, vindt gin wet’ouwer dat leutig. Of ’t noe groôte of kleine zaeken bin, de raed mot ’t zaahe. Want de gewone burher vindt de stoepe vlak bie z’n uus belangrieker as ons eiland over veertig jaer.

  bron: Ons Eiland  12-07-2012