ENDRIK’S COLUMN

VIENGERS

’t College is op de viengers etikt omdat ze nie doe wat of ze toe’ezeid è. In nog wè dû twî partijen. Petri van de PvdA vindt ’t mâ niks dat ‘r ’n meldpunt is vô overlast van feêstende joengeren. ’t Is klikken. Noe mot ik zaahe, de twî dames van deze partij blienke nie uut as ze d’r eihe motte inleve in aore maansen. Ik è dat â eschreve over Brigitte, die of vast nie in de binnestad woont waer of vees te lange zwaere vrachtauto’s mahhe komme. In ik dienke dat Petri nie in de West’oek woont. Want dan praet je wè andester. Vee maansen ier vinde ’t noe juust eêl goed dat ze aarhest trechte kunne as ze dienke dat ‘r wè ’s wat zou kunne gebeure. Beter te vroeg as te laete. De polisie kan zaalf nog aoltied bepaele of ze wat doe. As kleine partij mô je j’n eihe zô vee mohelijk laete ‘oôre, mâ doe dat dan mit echt belangrieke zaeken.
De twidde partij die ’t College op de viengers doe tikke is ’t CDA. ’t Gae over de marten, die ok op zondag te vroeg behinne. In ze vraehe eêl verzichtig of aol die marten de kwaliteit ver’oahe. Daer è ze zeker ’n punt, want ons ‘ore d’r mee verheve . In â je andelaers ’n vienger geet, griepe ze d’n eêlen and. 
De toeristen geniete zeker. Ik è de mart vô de deure in je kan somtieds over de koppen loape. Dust vô die maansen zâ de kwaliteit van de recreaosie wè oaher ‘ore. Mâ vô de bewoners van mien straete in ’t durp mot ik dat toch betwufele. Wulder kieke naemelijk aoltied tehen vee vrachtwaehes an, die achter de kraemen bluve stae. In dat is gin moôi gezicht. M’n è d’r mee lere leve in as ’t goed is doe m’n dat ok mâ eêne keer in de weke. Mâ m’n è ok dikkels ’n aevendmart in ’n nachtmart. Dan komme ze eêl vroeg in de middeg aoles klaerzette. D’r zou misschien ’s over epraet kunne ‘ore of je aol die marten nie over ’n paer plekken kan verdeêle.

bron: Ons Eiland  31-05-2012