ENDRIK’S COLUMN

VERHUNNIENG

Ons aode op Renisse ’n boekverkoapieng in de kaarke. Je mot tehenwoordig van aoles verzinne om centen binne te kriehen in dit loap eêl aarg goed. Dust dat doe m’n â zô minstes vier jaer. D’r ‘ore oliebollen ebakke in taerten, d’r ‘oor soep emaekt in koffie in gae zô mâ dû. ’t Is wè vee waark in j’ei ok vee vriewillehers noôdig. Mâ dat zâ de leut nie bedaarve. 
Dat deeje wè twî vinters in uniform die kwaeme vraehe of ons toch wè verhunnieng aode. D’n baes van ’t spul kwam d’r bie in stieng eêl versteld. Jao, zeie de uniformen, â je gin verhunnieng eit motte m’n de tente slute. Noe, zei d’n baes, dat mot dan mâ. Behriepe doe’k ’t nie, want me doe dit â vier jaer in m’n è nog noôit wat g’oôrd. In eên van de wet’ouwers ei net nog boeken ebrocht om ’t anbod nog groôter te maeken. De uniformen wiere toch ’n bitje onzeker in doste ’t ok nie an om d’eêle boel plat te goôien, dust mit ’n waerschoewieng dat ons de volhende keer wè verhunnieng moste anvraehe gienge ze de kaarke wî uut.
 je dit mee’emaekt eit is ’t toch wè leutig om in de krante te lezen dat de gemeênte in d’r eihe rehels verstrikt raekt. Teminsten, zô waark dat bie mien. De gemeênte wil in Aemstie starters’uzen laete bouwe, wat netuurlijk eêl goed is. Mâ dat wille ze doe op ’n plekke waer of ze oôit van of’esproken è dat dae noe juust nie gebouwd mag ‘ore. Dat ei iemand, die daer ’n uus wou zette, evrohe in die mocht ’t nie. Zô’n eêne zit noe netuurlijk wè in ’n commissie die tehen ’t bouwen op die plekke is. In ’n aore, die dae gin uutrit mocht maeke wiest ‘r noe op, dat de gemeênte dat dust ok nie mag. Ik wille mâ zaahe: dat krieg je noe mit aol je reheltjes, waevan de gemeênte zaalf ei gezeid dat ze minder moste ‘ore. Mâ jao, as amtenaeren ulder fantasie ’s goed laete draoie is ’t moelijk om minder reheltjes te kriehen, dan komme d’r enkelt meer.

bron: Ons Eiland  12-12-2012