ENDRIK’S COLUMN

TOETERE

In ’t ofheloape jaer is de nieuwe reheerieng behonne. Rutte ei gezeid, dat rechts Nederland z’n viengers zou kunne oflekke, zô moôi zou ’t vô die kant ‘ore. Ik wete nie of ze d’r nog zô over dienke, want ons motte noe toch aomè trughae. In ik dienke zômâ, dat maansen die of in ’t verkeer bekeurd ‘ore nie blie zû weze mit de boetes, ok â komme ze van rechts in gaet dat meêstentieds vô lienks. In dat bedoel ik letterlijk in fehuurlijk. Want de boetes bin op d’n eêsten dag van ’t nieuwe jaer nae bove ehae in dat nie alleênig, je kan noe ok nog vô meer fouten epakt ‘ore. In zeker op Schouwen-Duveland, want ik è eleze, dat ier de meêste boetes in 2011 uut’edeêld bin. Â’k ’t goed behrepen è, mag je wî minder toetere. De straoriejers mahhe wè oppasse! In ik mot ok eêl goed gae oppasse, want ik toetere nog â ’s enkelt omdat ik ’n bekende op straete zie. In dat mag nie mî, want ’t is gin noôdzaek. Ik dee dat netuurlijk vô de leut, mâ in ons land is ’t aomè nie zô leutig mî. Ze gae van aoles uutdienke om je centen te kunne ofpakke. Dae bin ze ier eêl goed in. Trek gae ze nog zaahe dat je ’n bouwverhunnieng mot anvraehe â je ’n sneêuwpoppe vô j’n uus zet. Net as bie die piraat in ’t Visslop. Dit aod’ik beter nie kunne schrieve, want ze zouwe ’s op ’n idee kunne komme.
Je mot eihenlijk perbeere de overtrediengen in ’t verkeer te maeken as ze ’t nie zie. Endrik ei zaalf ‘n keer of zesse ’n boete ekrehe, dust dat is nie zô slim. Aod’n mâ beter motte oplette. Dat waere trouwes nog gin boetes vô te vee leven maeke.
D’r bin plekken waer of wè wat meer leven zou mahhe komme. Ik è ‘oôre waoje, dat de lienkse partijen in de raed d’r over dienke om saeme te gaen. Dat zâ zô-as gebrukelijk wè eêl lank dure, mâ ‘t liekent mien verstandig. Misschien gae ze dan wat meer toetere, â je behriept wat ik bedoele.

  bron: Ons Eiland  15-03-2012