ENDRIK’S COLUMN

SPORT

Het gemeêntebestuur van Schouwen-Duveland ei gelok, dat ons eiland zô varre naer ’t noorden van Europa leit. De maansen bin dae nie zô gauw boôs. Je kan wè ’s in de krante leze, dat boôze boeren in Frankriek ulder maalk op de stoepe van ’t gemeênt’uus mietere. Of de juun waevô ze te weinig centen kriehe. Ik g’loave nie dat ’t in Zurrikzeê â ’s gebeurd is. Toch zou ’t goed weze, as de maansen ier ok ’s wat meer van d’r eihe liete oôre. Dan oeve ze van mien nog nie trek de sukerpeejen bie die striekiezders te mieteren, mâ ’n bitje protesteêre zou nie verkeerd weze. Mâ jao, de Schouwen-Duvelanders verhete aarg gauw, dust van de geschiedenis kunne ze nie vee lere. Endrik zâ nog ’s wat opfrisse.
M’n è ’t noe â dikkels mee’-emaekt, dat de gemeênte bepaelde gebouwen liet versloffe in op ’t goeie moment zeit: ’t is te diere om ’t op te knappen, me gae ’t mâ ofbreke in dan zette m’n d’r uzen vô in de plekke. Dat was nog nie zô lank elee in Aemstie zô, toe dat de gimmestiekzael vlakbie de schole of’edankt wier. In wat dienk je van de Concertzael? D’r most ’n groôt theater komme, dust de ouwe zael wier nie mî bieg’ouwe. In noe è ze nog aoltied niks. In ’t kommende jaer ‘oort de sportzael op Renisse of’edankt. In jannewaorie motte de kinders van de schole mit ’n bus naer de sportzaelen in Aemstie. Want je behriept: vô je lief is ’t eêl goed om in de bus te zitten, ok â gaet dat van de gymlessen of. Â je noe weet, dat de scholen van de minister t’oôren kriehe dat ze ulder les-uren ekenomisch motte gebruke, dan klopt’r toch iets nie. Kiek, dat ‘r in Zurrikzeê ’n groôt in dier sporthebeuren komt zâ eus wè goed weze. As ’t mâ nie zô is, dat in de durpen dan aole sportzaelen vort gae. Mâ ik è nog gin optocht van boôze ouwers op Renisse ezie in ok in de schole zaalf bluuft ’t eêl stille. Dust ik dienke dat ze ‘t ‘r wè mee seêns bin.

bron: Ons Eiland  10-11-2011