ENDRIKS’ COLUMN

SALAMI

’t Is â wî jaeren elee, mâ ik bin ’t nog nie verhete, dat ’t zieken’uus in Zurrikzeê van ons wier of’enome. In d’r was ’n dokter die of in dat zieken’uus dee waarke in zei dat ‘r salamitaktiek was gebruukt. Eihenlijk zeid’n dat â eerder. Taalkes ’n stikje van de woste d’r ofsnieje. Dust bie ’t zieken’uus aalke keer wat weg’aele in overbrienge nae Goes totdat ze konde zaahe dat ‘r in Zurrikzeê te weinig kon gebeure in dat aoles mâ nae Goes most gae. Dat was dan goekoaper in beterder. Noe, neem mâ van Endrik an, gin van beie is uuthekomme.
Over de centen zû m’n ’t nie è, daer is in de ofheloape jaeren genocht over geklaegd in dat ’t agheêl nie goed waarkt in Goes bliek gereheld, want ze stae aolsmâ onder toezicht omdat ’n bepaelde ofdeêlieng nie goed draoit. ’t Ofheloape jaer wier ons eihe College van B. en W. dû Brigitte van de P.v.d.A. onder de neuze ewreve, dat ze mâ ’s mit aole voorstellen tehelieke moste komme, want taalkes ’n bitje, dat leek tevee op salamitaktiek. In dat dee ze dust nie vertrouwe. Jao, as je in de oppositie zit mô je wè ’s moelijk doe in ik dienke dat ze gliek ao. Je mot ‘r aarg mee oppasse, want vô dat je ’t weet kan ’n wet’ouwer zaahe dat ‘r iets â te varre is in nie trug’edraoid kan ‘ore. Want d’r bin dan â bevobbeld ofspraeken emaekt in ’t zâ de gemeênte centen koste â je nie varder gaet op de wegt die of in’eslohen is. Kiek mâ naer de bouw van uzen die of ze eihenlijk nie mî wille bouwe, mâ jao, je bin noe te varre mit de plannen, dust….Wat ‘r noe in eêl Zeêland gebeurt is ok salamitaktiek. D’r ‘ore tevee diensten van ’t rijk naer aore plekken over’ebrocht. In over ’n jaer of zô beslute ze in Den Aeg dat Zeêland mâ saemehevoegd mot ‘ore mit bevobbeld Braebant in Zuud-Olland. In ik voorspaale dat ‘r bie gezeid ‘oort dat ’t vee goekoaper in beterder zâ weze.
Ik luste allank â gin salami mî. (foto: Ons Eiland/PR)

 

bron: Ons Eiland  18-04-2013