ENDRIK’S COLUMN

ROAVERS

Ons wete aomè twint wè dat je beter nie in de buurte van Somalië kan gae vaere in zeker nie mit groôte schepen, want dae bin vee zeêroavers. Je kan gereheld in de krante leze, dat ‘r wî ’n schip in’epikt is in d’r schient nie vee tehen te doen te wezen. Jao, d’r vaere wat merineschepen, mâ ’t gebied is zô groôt, gaet’r mâr an stae. Vaneihest zouwe d’r bewaekers mit vee waepens mee kunne op aole andelsschepen, mâ ik g’loave dat ’t nie mag van de reheerieng. Dae behriep ik noe net niks van. Neênt, dan is ’t gemeêntebestuur van Schouwen-Duveland vee dudelijker in flienker. Want in ’t Visslop è ze ’n piraat ondekt bie ’n café in die è ze glieke van de mure motte snokke! Kiek, dat noem ik nog ’s krachtdaedig optreejen. Mâ net as bie Somalië, ik behriepe d’r niks van. Ik dienke dat zukke diengen bie ’n wienkel of café Zurrikzeê noe juust leutiher maeke. Mâ d’r zâ wè wî eên of aore rehel weze die of dat leutihe onmohelijk maekt. Ik g’loave dat je d’r ’n bouwverhunnieng vô noôdig eit! Z’è evrohe of de burhers reheltjes wouwe opnoeme die ze zouwe kunne schrappe, noe, ier ei je d’r dan eêne.
Gelokkig stae d’r op ’t eiland ok diengen waer ze niks an kunne doe. Bevobbeld dat vliegtuug midden in ’t land bie Oôsterland. Dat is ’n Belhische straeljaeher eweest in laete ze noe toch dat dienk nie weg kunne aele. Nie vanuut Den Aeg in nie vanuut ons gemeênt’uus. Indertied ei wet’ouwer v.d. Wekken nog op’emorke dat ’n nie wist dat dae ’n vliegveld was. Mâ ok Roel eit’n nie weg kunne kriehe. In eihenaer Stouten is de onschuld zaalf, ie weet nie zeker of t’r nog ’n motor in zit. Ie weet eihenlijk niks van dat dienk, enkelt dat ’n dae leutig staet. ’t Zou Bru’s kunne weze, dae wete ze ok van niks. In Endrik vindt dat ’t mâ zô mot bluve. In ie oopt dat de piraat rap trugkomt in ’t visslop in dat vee zaeken ok zô-ies anschaffe. Dat is vee aordiher dan ’t geruzie over de BIZ.

bron: Ons Eiland  22-12-2011