ENDRIK’S COLUMN

QUOTE

Wulder è noe op ‘t eiland â ’n paer jaer ok ‘n Quote. Je wete wè, dat is ‘n lieste van de riekste maansen in ons land. Zô’n lieste, daer è m’n netuurlijk êêl vee an. Vooraol â je zaalf nie rieke bin. In de Wereldrehio kwam ok zô’n lieste, mâ dan van maansen mit invloed op ons eiland. Nie “onder invloed” mâ “mit invloed”. Endrik ei dae weken lank nie van kunne slaepe. Ik most ‘r aolsmâ an dienke, of ik toch wè bie de eêste vuuve zou stae. Mâ ik stieng eêmae nie genoemd. Ik was t’r kepot van! In ’t ofheloape jaer ok â nie. Dat gae toch an ’n maans knaehe. Dust noe laah’ik in baade mâ te dienken: waerom nie? Over wat vô invloed gaet ‘t bie de eilandquote? Is dat eihenlijk wè te meten? D’r stae wè aarg vee maansen op, die invloed op de polletiek in de ekenemie è. Mâ invloed op de gêêstelijke zaeken van ‘t eiland? Dan mô je netuurlijk bie Kees van den Berge weze, want die dee nog ‘s vô de zondagsrust pleite. Mâ Kees è’k nie op de lieste zie stae.Wè Michiel de Zêêuw, mâ nie aole aore doomnies die nie in Waereldrehio mahhe schrieve. Mâ goed, ik leze graeg z’n stikjes. ‘t Gaet ‘r om, dat m’n ons eihe op ’t eiland gelokkig voele in ik twufele, of ik dû ’t genoemde krootje gelokkiher bin. Endrik ei noe z’n eihe Quote emaekt. In die gae over krootjes van maansen.
1. De vriewillihers, want die zurhe d’r vô dat onze vereênehiengen, kaarken in instelliengen as bevobbeld ’t Hospice kunne bluve bestae.
2. Aole maansen die ok vô ons d’r besten doe mit teneêl, musical, zienge in ’n koor, spele in “de meziek”, want cultuur angt’r ’n bitje bie de kommende tied.
3. Aole raedsleden, want die doe waark wat of ons zaalf nie wille doe, mâ waer of ons wè ‘n bitje om kunne lache.
Ik è gin eêne naem enoemd, dan oeve ze ok nie wakker te laahen. Ze stae d’r aomè op. In dien aore Quote? In de glascontainer mietere. Want roem is broôs as glas.

bron: Ons Eiland  19-01-2012