ENDRIK’S COLUMN

Onbehriepelijk

D’r is t’r eêne in de gemeênteraed die of je aoltied kan zie op plekken waer vee maansen bie mekaore komme in dat is Jacqueline van Burg van LSD. Ik zaahe ’t noe nog mâ ’s mit naedruk: dat is Leefbaer Schouwen-Duveland. Dust as Jannekee in Endrik mit Nieuwjaer in ’n durps’uus komme mit ulder nieuwjaersgesprek komme ze gereheld ok dat vrouwmaans tehen. ’t Kan netuurlijk weze dat ze graeg tussen de maansen zit in ulder meênieng wil ‘oôre. ’t Kan ok weze dat ze ’t enkelt vô de partij doet, mâ ik èt ’t tot nog toe op ’t eêste g’ouwe. Ik è aoltied gedocht dat ’t eên van de weinihe raedsleden is, die of echt belangstellieng eit vô wat de burhers dienke. Mâ noe ze zô makkelijk 400 bezwaerschriften opzie ei geschove gae ik toch twufele. Ik vinde dat naemelijk onbehriepelijk.
Noe is t’r netuurlijk wè meer onbehriepelijk. Zô behriep ik â jaeren nie dat de polletiek de koôle in de heite wil spaere dû op verscheie plekken ’n paer windmolens neer te zetten. Want ’t is gewoon ’n rot zicht. Wulder è in Amerika in Palm Springs 4000 windmolens ezie, die stae daer bie mekaore in daer komme vee toeristen naer kieke! Dust wat mien anbelangt is t’r ier eêne plekke waer of t’r ’n paer onderd van die krengen mahhe komme in dat is Neeltje Jans. Daer ei gin maans d’r last van in ’t zou ok vee toeristen trekke. In as ze dan die lillijke grieze pijlers ’n kleure gee zô dat ze achter mekaore ’n rehenboog vurme komme d’r nog vee meer. In dan komme d’r wè bezwaerschriften van – netuurlijk – de Vohelwacht (waer zou die gin bezwaer tehen maeke?) van ’t Zeêuws Landschap, Netuurmonementen, De Vrienden van Knauwende Knienen in gae zô mâ dû, mâ die motte ze gewoon opzie schuve. As Van Burg dat mag, mahhe wulder dat ok. Je mot ’t toch leefbaer ouwe, is ’t gin waer?
Dat ’r noe drie van die molens mahhe komme is wî zô’n voôrbeeld van die koôle in die heite. Bea Flach van ’t CDA kon ’t bie Omroep Zeêland aomè uutlaahe. Vrouwen…onbehriepelijke wezens. bron: Ons Eiland  07-07-2011