ENDRIK’S COLUMN

MEZIEK VERBROEDERT

Sturm
M’n aode wî de meziekdag op Schouwen-Duveland. Aole meziekvereênehiengen kwaeme bie mekaore om te toeteren in te trommelen. ’t Was ok dit jaer op Renisse, want dan ei je nie enkelt je femielje, mâ dan bin d’r ok nog losloapende toeristen. D’r wier genote. Â je ’n stik van d’n dag meemaekt, kâ je zie dat ‘r muzikanten bin, die bie meer as eêne vereênehienge meedoe. Dat bin de echte lief’ebbers. ‘n Vrouwe zei: ik zie d’n zelden, mâ ik è ’n toch nog wè ’s noôdig om ’n kepot lampje te vervangen.
Endrik zat te luusteren bie Nut en Uitspanning uut Zonnemaire in miek dae opmaarkelijke diengen mee. ’t Zat de vereênehienge tehen. D’r was gin darde trompettist, in ze moste ’n stikje doe vô drie trompetten. De dirihent gieng toe zaalf mâ meeblaeze in d’n baes van de trommelaers gieng mit de stok zwaoie. Of dat ’t noe kwam dat ’n dat zô mit eêl z’n lief dee weet ik nie, mâ ’t gieng aneêns eêl ard waoie. De meziekpepieren vlohe buten de tente. Mâ d’r waere genocht luusteraers om ’t op te raepen in trug te geen. Daenae was ’t de beurte an de trommelaers. Die stienge vô de tente in krehe de sturm pas goed te verwaarken. Noe wiere zaalfs de lessenaers omvarre geblaeze dû de wind. Mâ gin noôd: de fluitiste kwam nae benee om ‘n lessenaer in tehelieke de map mit meziek vast t’ouwen. Ik dienke dat ze d’r ’n lammen aarm van ekrehen eit. Mâ dat was laeter nie mî t’oôren, ze dee wonderschoôn blaeze. Ok ’t vaendel woei bienae omvarre. Gelokkig was t’r de vaandeldraeher. Die ao d’r alleênig nie op’erekend dat ’n wat most doe, dust die ao gin uniform. Op z’n klompen en in korte broek zat ’n neffen ’t vaandel. Noe is dat vôr um eêl gewoon, want de burhervaoder eit’n nog ‘s ’n lintje op’espaald in toe was ’n ok zô gekleêd. Mâ jao, ie wist ok nie dat ‘n dat lintje zou kriehe.
Zô è m’n op de meziekdag vee moôis ezie in ‘oôrd. ’t Mag dan in of buten de vereênehienge wè ’s sturme, meziek verbroedert!.

bron: Ons Eiland  28-06-2012