ENDRIK’S COLUMN

KLIMBOS

In Zuud-Europa mahhe ze Angela Merkel nie. Daevô mô je eêl diepe graeve. In ’t jaer 9 ei naemelijk de Germaanse Hermann in ’t Teutoburgerwoud de Romeinen ’t moeras in’ejohe in ze dae ’n kopje kleiner gemaekt. Dat is noôit mî goed gekomme. Jao, je mot je geschiedenis kenne om de tied van noe te behriepen.
Wulder bin in ’t Teutoburgerwoud weze kieke. Dae staet ’n monement, 53 meter oahe! Noe gae ik ier gin les in geschiedenis gee, ’t gaet om wat ons dae nog meer zaehe: ’n echt klimbos! Wulder zouwe dat agheêl nie op’emorken è as m’n d’r nie vlak neffen estaen aode. Want je ‘oôrde bienae niks, omdat de boamen ’t leven ok nog ’n bitje tehen’ouwe. 
De gemeênte ei groen licht ehee vô ’n klimbos bie Westenschouwen. In dae bin maansen boôs over. Ze zaahe dat ‘r vee leven zâ komme in dat ’t nae petat zâ gae stienke. Noe, dat stienken, dae bin de bewoners van de Rieng in Aemstie of Renisse wè an gewoon in ons leve toch nog aolemaele. Want d’r is niks wat z’n eihe zô gauw an doe passe as je neuze. In leven, dae g’loaf ik sint ’t bezoek an ’t Teutoburgerwoud ok nie in. Dat ’t klimbos ’n stik bos zâ koste, daer ‘oor eêl weinig van ezeid. Zaalfs boswachter Dirk eit’r nog niks over laete ‘oôre. ’t Zâ wè komme omdat Groen Lienks op z’n gat leit. Of ie ziet netuurlijk ’n zak mit centen nae Staatsbosbeheer toekomme. Ik mot nog zie, dat dae vee maansen nae toe gae. Mit goed weer gae ze liever nae ’t strand in mit rehenweer is t’r niks zô aarg as ’n nat bos. Dust ’n slechtweerhebeuren is ’t ok nie. Die zouwe d’r juust motte komme. Toch dienk ik dat de gemeênte gliek eit dû dit toe te staen. Â je toerisme belangriek vindt mô je ok meer mohelijk’eden vô leut anbieje. Ik ouwe wè van ’n bitje leut vô de kinders, dust wat mien anbelangt ‘oort ‘r volhend jaer ’n klimbos geopend dû ’n eêl blieje boswachter. Ik ver’euhe m’n eihe noe â om Dirk te zie sliengeren.

 

bron: Ons Eiland  18-10-2012