ENDRIK’S COLUMN

Klappen

Net vô ‘t aande van ‘t ouwe jaer krehe m’n onverwachte klappen. D’r waere netuurlijk ok â de verwachte klappen. D’r schient ‘n rehel te wezen, dat vierwaark ontstoke mag ‘ore op ouwejaersdag van tien ure of soches, mâ zô’n rehel kâ je net zô goed ofschaffe. ‘t Behint â ‘n paer daehen eerder in je zou in aalk durp ‘n stik of onderd ahenten motte è, om te zurhen dat de rehel naeheleefd ‘oort. Vô de maansen mit ‘n ond of ‘n katte bin ‘t zwaere daehen, want waere ‘t vroeher nog gewone klappen van ‘n rotje, noe bin ‘t donderslaehen. Je schrik je bienae dôôd. Aol die maansen mit uusdieren zouwe d’r nie rouwig om weze, as zukke zwaere diengen verboje zouwe ‘ore. ‘t Siervierwaark is netuurlijk wat andester. Om twaolf ure, nae de kossen in “de aolerbeste waansen”, schuve wulder de gerdienen ope in m’n è ‘n eêl môôi uutzicht op aol ‘t môôis dat of speciaol vô Endrik in de vrouwe de locht in gaet. Noe, dat viel dan vies tehen van de keer, want van ‘t durpsplein was nie vee te zien. Dikke mist. Eêl vaeg konne wulder nog ‘n paer gekleurde uutspattiengen zie.
Van de vees te arde donderslaehen è m’n ‘n paer daehen last in dan kâ je wî ophelucht aedem’aele. Mâ de onverwachte klappen? Die krehe m’n dit keer van de gemêênte. ‘t Liekent wè of dat ‘t College eêl lank ei zitte twufele in vlak vô ouwejaer docht dat ze ‘t noe toch ‘s op de breêveêrtiene moste briengen: de Schouwen-Duvelandpas mit vô d’ouweren gratis reize ier in naer Goes is vô de gemêênte nie mî te betaelen. Op dezaalfde meniere is de Stichtieng Durps’uzen anêêns mit ‘n bericht gekomme vô de beheerders. Ik dienke dat bie vee maansen de smoutebollen zôdoende nie zô lekker smieke as aore jaeren. Netuurlijk, d’r zâ wat motte gebeure, de centen bin diere g’ore. Mâ oe brieng je dat in wanneer? Trek nae de kossemisse, ‘t fêêst van ‘t licht? Trek nae nieuwejaer? Lae m’n de briengers van ‘t slechte bericht niks andoe. Lae m’n ‘s kieke wat of m’n d’r an kunne doe. 

bron: Ons Eiland  05-01-2011