ENDRIK’S COLUMN

KEPOT

Endrik in de vrouwe bin in Luxemburg eweest in ok in de Elzas. Zômâ vô ’n weke. Wat zaehe wulder dae machtig vee blommen in de durpen in steden. Nie enkelt an d’uzen, mâ ok an paelen in bruhhen. 
In wat oort zô’n plekke dan aneêns vee moôier. Wulder vonde aolebeie dat ze dat ier net zô zouwe motte doe, op ’t eêle eiland. Kan dat ier noe nie? Neênt, dat kan ier nie. Ze perbeere ’t aalk jaer in mien durp, mâ de vandalen ouwe d’r nie van as t’r wat moôier emaekt oort. Aoles mot gewoon kepot. Dâ’s vee leutiher. In dâ’s nie enkelt in mien durpje, ô. Baalneênt. In de krante stieng ’t bericht dat Dirk Fluit, de boswachter, eêmae confuus was omdat in ’t eêste drukke zomerweek-end zôvee kepot emaekt was, twint dat ‘r ’t eêle jaer nog niks gebeurd was. In mien eihe durp is ’t dit jaer eêmae raek. Ik ‘oôrde van de schilder, dat ’n nog noôit zôvee ruten most inzette. Zaalfs de ruten van de terrasjes op ’t durp ‘ore kepot emaekt in dat is speciaol glas. Dae mô je mit ’n aemer op tekeer gae in dan is ’t enkelt eboste. Ofheloape weke wier d’r ’n groôt stik van ’n auto of’ehaeld in op ’t dek van ’n aore auto eplakt. Mit eêl staarke liem. Die mô je dan toch van uus of van de campieng meebrienge mit de bedoelieng om wat te slopen. Behriepe julder dat nog?
È ze dan in Luxemburg gin jeugd? Netuurlijk wè, mâ die jeugd liekent andester, want waerom bluuft daer aoles gewoon ange in mot ’t ier van de paele esnokt ore? Dit zou noe ’s eêne motte gae onderzoeke. Dan mag ’n van ons daerop ok nog promoveere. In dan nie zô’n onderzoek waer of wulder mit z’n aolen niks an è, in waer uutkomt dat maansen die aalken dag doese schoôner bin as maansen die of enkelt op zaeterdag in de tobbe gae. ’n Onderzoek waerom onze joengere aoles gae slope, twint dat ’t in de Elzas of Luxemburg nie gebeurt. Ik voôrspaale dat ’t ok te maeken eit mit zupen.

bron: Ons Eiland  26-07-2012