ENDRIK’S COLUMN

Droame

Zô tehen ‘t aande van ‘t jaer, mit zicht op smoutebollen in appelflappen, gae Endrik nog â ‘s droame. Endrik ziet de gemêênte op ‘n roze wolk drieve. Wet’ouwer Stouten stae mit ‘n grôôte spiekerspae klaer om aole burhers van ‘t eiland blie te maeken mit ‘n emmertje zout. ‘t Emmertje mô je nog wè zaalf meebrienge, mâ de maansen stae in ‘n reke van wè ‘n kilometer lank te wachten op ‘t zout van d’aerde. Wet’ouwer Verseput zit te praeten mit kwaeje Zurrikzêêjenaers, want mit praeten eit ‘n â meer zaeken wete op te lossen. Die Zurrikzêêjenaers motte nie zô flauw doe over te zwaere vrachtwaehes, wat is noe ‘n schore in j’n uus? Zô zwaer mô je dat nie zie, ô. De gemêênte weet aoles van schoren. Je mot ouwe pak’uusjes of ‘n theater laete stae totdat ‘t bienae in mekaore dondert, dan kom Zêêuwland vanzaalf de zaek overneme. In de ondernemersvereênehienge Neptunus is ‘t mit z’n seêns, die weet ok aoles van schoren. Mit rehelmaet bin de ondernemers in Zurrikzêê ‘t nie seêns in dan duuk Neptunus gewoon ‘n stuitje onder. De burhemêêster ouw ‘n lieste bie van aole bejaerdensozen waer of ‘n nog koffie mot gae inschienke. ‘t Is netuurlijk wè jammer dat wet’ouwer Outekamer diezaalfde kopjes dierder gae maeke dû minder centen te geen, mâ die bejaerden motte nie zeure. Ze motte gewoon de kopjes kleiner maeke, dat doe ze in de horeca ok. In gee ze d’r ‘n koekje bie zô grôôt as ‘n euro. De bejaerden ‘ore toch â gebutterd in gesukerd, die è ‘n Schouwen-Duvelandpas ekrehe, dae kun ze vô niks mee reize. Outekamer zit te schrieven, even kieke waer of ‘n mee bezig is. ‘t Evanhelie van Gilles? “In de daehen dat ‘r an de pôôten van de trôôn van de konehinne wier esnokt in mêêster Gerard reheerde over Schouwen-Duveland geschiedde ‘t dat de gemêênte de OBZ dee ver’oahe, zôdat aole uzen anêêns vee meer waerd waere…..”
Endrik is wakker eschrokke. Ie zit toch mit ‘n spieker in z’n maehe. Ons zû in ‘t nieuwe jaer nie op ‘n roze wolk zitte. ‘t Gemêêntezout kû m’n â nie mî of’aele.

bron: Ons Eiland  23-12-2010