ENDRIK’S COLUMN

Deure

Noe dienk ik zômâ dat wet’ouwer Verseput van Schouwen-Duveland in burhermoeder v.d. Velde van Goedereede de Brouwersdam saeme verkocht è an Engeland. Want d’r is ’n project vô d’n dam gaende mit de naem: Brouwersdam, Hotspot for Active Leisure. ’t Mot toch nie zotter ‘ore. De bedienker van deze naem is te ard mit z’n oôd tehen ’n deure an’eloape. Wet’ouwer Stouten is ok tehen ’n deure an’eloape. Ie wil dat ’t openbaer onderwies in ’t christelijk onderwies mî mekaore overlehhe, oe dat ’t varder mot as de scholen in ’n bepaeld durp aolebeie te klein ‘ore. Daer eit ’n netuurlijk groôt geliek in. Mâ de baezen van Radar, dat is de vereênehieng van christelijke scholen op ’t eiland, è noe â de deure dicht’ehoôid. In dat kan ik nie behriepe. Want ik docht, dat in 2011 ’t kind toch wè ’t belangriekste zou weze, mâ bie Radar is de “identiteit” net even belangrieker, liekent ’t wè. Ze wille eihenlijk nog liever saemenhae mit ’n geliekhezinde groep buten ’t eiland. Noe lieg ik nie, as ik zaahe dat eêl vee ouwers agheêl nie naer de identiteit kieke. Ze kieze de schole die dichtebie staet in ok goed is. Mâ wat gae ze noe doe as zô’n schole eêl klein ‘oort? Op Renisse aode m’n aoltied mâ eêne schole in wat is dat belangriek vô de kinders. Want kinders van “nietkaarkelijken” spele mit kinders van godsdienstihe femieljes in dat gae eêl goed. ‘t Maek nie uut dat d’n eênen op zondag gae voetballe in d’n aoren nae de kaarke gaet. Kinders motte verdraegzaem’eid lere in respect vô ’t geloaf van ’n aore. Ok vô ’t durp is dat eêl goed. D’r is bie de groôte maansen maklijker saemenwaarkieng. Dat è m’n op Renisse dikkels ezie. Noe wil ik eêmae nie d’ouwe strijd tussen christelijk in openbaer ankaerte. Aalk maans mag z’n eihe principes d’r op nae’ouwe. Mâ ik vinde ‘t jammer dat ’t bestuur van Radar nog dienkt as vuuftig jaer elee. Ik zie ze nog ’s naer onze Engelse Brouwersdam marcheere, ziengend dat ouwe strijdlied “Onward Christian Soldiers”. Mâ of t’r dan ok nog vee ouwers meeloape? Ik betwufel ‘t.

bron: Ons Eiland  14-04-2011