ENDRIK’S COLUMN

DANSE

Gae julder wè ’s danse? In è julder de Harlem Shake â edae? Dat is noe eêlemaele in. Endrik eit ’t â ’n keer geperbeerd. Ie gieng op de taefel stae mit de theemuste op z’n oôd in miek de raorste beweehiengen. Net op dat oahenblik kwam de vrouwe binne. Dat viel eêmae verkeerd. Bin jie noe glad besukerd, ‘k è net de taefel of’edae. Zô kan’k wè an de gank bluve. Zô gieng ze nog ’n stuitje dû. Ik zei nog dat ’t goed is vô je welwezen in meer van die moôie praet. Ze is meêstentieds toch nie zô’n kerbikse, mâ van de Harlem Shake mot ze niks è. In d’r bin d’r meer zô, è’k wè eleze. Want de jeugd van de brandweer in Aemstie ao ’n video van ulder Shake emaekt in op You Tube ezet. Mâ de Veilig’eidsrehio zei dat ‘t ‘r wî of most. Want z’aode gedanst in de brandweerpakken in die bin dû ons mit de belastiengen betaeld. Ik wete nie wie of t’r betrokke bin bie die veilig’eidsrehio. Ze zû ’t best goed bedoele, mâ dit vind’ik toch wè flauw. Die jeugdbrandweer is eêl aarg goed bezig. Ze doe zô goed d’r besten, dat ‘r nog â dikkels priezen ehaeld ‘ore bie wedstrijden. In ze bereide d’r eihe vô om de saemelevieng van dienst te wezen as ze wat ouwer bin. Mahhe ze dan ok ‘s ’n keer uut ulder dek gae? Kiek, Endrik ei ok niks mit dat gedoe. Ie wil nog wè ‘s ’n foxtrotje danse, mâ ie weet, dat ’n foxtrot vô vee maansen te ouwerjaers is. In zeker vô de jeugd. Toe ik van dat trugfluiten bie de brandweer las most ik dienke an d’n tied van de Beatles. Die aode lank aer in dat wier glieke de nieuwe mode. Noe zou d’r gin maans mî van opkieke, mâ d’r waere toe toch vee ouwers, die dochte dat de waereld zou verhae as aol die joengers lank aer zouwe è. Me bin d’r nog aoltied, mit lank aer in mit dansen. Kom Veilig’eidsrehio, j’oef nie op de taefel te dansen, mâ ’n bitje ruum bluve kieke, ô.

 

bron: Ons Eiland  02-03-2013