ENDRIKS’ COLUMN

BROEIE

D’r loap ’n zeêlieven bie ons vô ’t uus. In mâ pikke in ’t gos om eten te vinden vô de kleintjes. Ik ao ’t â g’oôrd van bure: d’r zit ’n paertje zeêlieven te broeien op ’t platte dek van ‘t ‘otèl in de straete. Ik dienke dezaalfden as ’t ofheloape jaer. Toe waere d’r aneêns tweêë an ’t scharrelen mit drie kleintjes. Eêl moôi om te zien. Zô’n jaer of twintig elee dee aalk jaer ’n paertje op ’t dek van de schole ’n nist bouwe. Wulder noemde ze toe nie scholekster, mâ schoolekster. ’t Was leutig, mâ ’t ao ok ’n naedeêl. Want gereheld keke ze nieuwshierig van ’t platte dek dû de smalle bovenraemen nae binne, tot groôt vermaek van de kinders. In die wouwe wulder wè bie de les ouwe. Dan stieng je net vol vier ’n ver’ael te vertaalen in dan klonk d’r vlak vô de raemen van de klasse: tepiet! Weg andacht. ’t Is ’s gebeurd dat ‘r zô’n jong veuheltje van ’t dek in de patio is evaole. M’n è aoles geperbeerd om ‘t te pakken te kriehen, mâ dat beêsje was zô rap, ’t lukte nie. Ik g’loave dat ‘t nae ‘n stuitje van d’n oenger is doôd ehae. Ik dienke noe zômâ, dat de zeêlieven die ik vandaehe zie scharrele femielje bin van de scho(o)lekster indertied. ’t Is mien op’evaole dat ze vlak bie de straete stae te pikken in d’r eihe agheêl niks antrekke van auto’s die dae gae parkeere.Ik mot ‘r dan toch an dienke oevee tehenstand ‘r indertied was toe dat ‘r ’n fietspad lengst de Oôsterschelde an’eleid zou ‘ore. Dat kon nie, want dae zouwe de veuhels in Plan Tureluur last van è. Wulder è twî schoorsteênpuupjes op ’t dek, die m’n nie mî gebruke. Aalk jaer ‘ore ze bezet dû kauwen, die of daer ulder nist in maeke. Ons laete dat mâ doe. Toch bin d’r zô zachjes an vees te vee van die zwartjakken. Misschien zie wulder daedû vee minder kleine veuheltjes. Dust eihenlijk bin ons te gastvrie vô de kauwen. Ik g’loave dâ’k ’t mossehilde mâ ’s om raed gae vraehe. Boven: Endrik. (foto: Ons Eiland/PR)

 

bron: Ons Eiland  16-05-2013