ENDRIK’S COLUMN

STOKKEN

Vuuf jaer elee waere de vrouwe in ikke in Peking. Dust nog vô dat de Olympische Spelen dae behonne. Â je mit ’n bus van ‘t ’otèl naer ’n restaurant ree dee je dae meer as ’n ure over. Nie omdat Peking zô groôt is, mâ omdat ’t verkeer eêmae vast zat. In toe reeje d’r dien dag toch enkelt de auto’s mit ’n oneven nommer, want zô was de rehel. Aalken dag was ’t in de stad ’n bitje diezig: smog. Nie gezond, dust z’è toe vô de Spelen ’n stik of wat fabrieken stil’eleid.
De inwoners aode dikkels ’n doekje vô ’t gezicht in om gezond te bluven zurgde zulder dat ze vee bewehieng krehe. Ons stienge eêl versteld te kieken, toe dat ons midden in de stad in ’n groôt park kwaeme. De inwoners zaalf waere dae nie om te kieken, mâ om wat te doen. 
D’r waere d’r vee mit riengen in ballen an ’t goôien. Aore lui kwaeme bie mekaore om les te kriehen op blokfluiten of om saeme as koor te ziengen. In d’r wier ok druk ‘edanst. Gin Chinese dansen mâ gewoon westerse, zô-as je die aalke maend ok in ’t durps’uus van Ouwerkaarke kan ‘oôre in uutvoere. Wulder vonde dat eêl goed in zaehe ok dat ‘r gin eêne Chinees ’n dikken buuk ao. Die zie je ier juust eêl vee!
Mâ noe zag ik in de krante ’n foto van ’t strand bie Bresjes, waer of maansen mit stokken stienge te zwaoien. Wushu stieng d’r bie. In jao ô, je kan noe ok in Zeêland doe wat wulder in Peking zaehe: Wushu, Tai Chi of Qigong. Of’ekeke van de Chinezen. Gae ’t ok doe, maansen, over ’n paer jaer is t’r gin Zeêuw mî mit ’n poke van ier tot gunter. Dat lillijke woord poke mag ik van de vrouwe nie gebruke, dust ik mot noe gauw op’ouwe mit dit stikje. De vrouwe is ’n stok an ’t zoeken, nie vô Wushu, mâ om mien achterop te kommen. As t’r over twî weken gin stikje van mien in de krante staet weet je waer of ’t an leit.

  bron: Ons Eiland  22-08-2012