ENDRIK’S COLUMN

BORRELE

Lukkie Zijlstra uut Dreister is zô blie mit de nieuwe pak’uusjes in Zurrikzeê, die of ze noe an ’t bouwen bin, dat ze glieke de kans griept om te zaahen dat wulder meer motte borrele. Want Lukkie doe aoltied graeg d’r ziele uutsloave vô zukke diengen. Noe is Endrik d’r graeg bie as ’t om ’t innemen van ’n gosjepieter gaet, mâ toe dat ik varder dee leze è’k behrepe, dat ’t om leutihe ideetjes gaet om je durp of stad moôier te maeken. Ze zei bevobbeld, dat de maansen in de Rozemarijnstraete rozemarijn in bakken konde doe. 
Endrik is glieke ok gae borrele, mâ toe dat ’n behonne was bleek dat j’ok raore diengen kan kriehe. Kiek, de maansen in de Klaproosstraete, de Klaoverstraete of de Korenblomstraete in Schaerendieke è ’t maklijk. Of de Lelie in Brouw. In eêl vee durpen oeve de maansen nie lank te dienken, want dae bin genocht blommenaemen. Mâ vô Vlasakkers ‘oort ’t â wat moelijker. In mien durp è’k bie eêne in z’n ofje vee molens zie stae. Die was dust â eerder an ’t borrelen, mâ noe woont ’n wè op de verkeerde plekke, want ’t is nie de Molenweg. Â je an de Kloôsterweg woont kâ je netuurlijk wat an je kleren gae doe. Mâ dat ‘oor wè pikant â je an de Bloôteweg zit. In wat motte de maansen doe van ’t Sliengerbos? Aalken dag flienk borrele liekent dan ’n goed idee. In wat doe m’n mit de Stekelstraete? Jao Lukkie, zô eit ok aalke medalje ’n aore kant. Mâ ik bin ’t mit je seêns, je mot bluve dienke oe of je j’n eihe omhevieng moôier kan maeke. Jammer, dat vee joengere dae ’n bitje andester mee ommehae nae ’t borrelen. Bie Staatsbosbeheer è ze dat dit jaer goed emorke. Nieuwe borretjes waere kepot emaekt of verdwene. In ‘oute borretjes bin eêl maklijk kepot te kriehen.
Moôier maeke. Vleweke è’k nog ’s uuthebreid stae kieke op ’t Aevenpark in Zurrikzeê. Dat is eihenlijk nie moôier te maeken in toch wil de gemeênte dat verrinneweêre. Onbehriepelijk. Je zou ’t mit je lief tehen wille ouwe. Dâ’s te vee borrele.

bron: Ons Eiland  22-09-2012