ENDRIK’S COLUMN

Reheltjes

Wat bin ik blie dâ’k gin boer op Schouwen-Duveland bin. Want die boer krieg van lienks te maeken mit duzende ganzen, in van rechs mit de rehels van d’overeid. Want kiek, dr zou bevobbeld s n stikje mure in de grond kunne zitte dat misschien bewaerd mot bluve.
Wat bin ik blie, dâk gin schoolmêêster mî bin. Want die eit van lienks te maeken mit aolerande nieuwe zaeken, omdat aalke minister vindt dat d’aarme kindertjes op n aore meniere motte lere. (In zô most Endrik ok in t verleden n goeie rekenmeniere verandere, want de kinders moste toch vee leutiher lere rekene, mit veraeltjes in zô. Ze bin dr noe eindelienge achter’ekomme dat de kinders die â moeite mit rekenen è nog vee slechter of bin) Mâ van rechs eit ’t onderwies op ons eiland te maeken mit wetouwer Roel. In die kan juust êêl goed rekene. Ik gloave best dat wetouwer Van der Wekken vee goeie diengen doet, mâ de zaeken meer bekiekt van de centenkant. Of n noe zô vee eit mit t onderwies, dat betwufel Endrik toch wè n bitje. Op You Tube dee n verkondihe dat de schole op Noordwaale mâ opeheve most ore. Want die kleine schooltjes waere vees te diere. Jao, Roel draoit r nie omene in dat vindik êêl aarg te priezen. In de polletiek oor â genocht gedraoid. Mâ noe is die schole vee grôôter g’ore in dr is twint niks an t gebouw gebeurd. In dan praete m’n nog nie over die gymzael in Aemstie. Gae mâ ’s vraehe oevee tied ze noe kwiet bin an ’n gymles in de sport’al die of vee varder van de schole ofstaet.
D’r bin noe twî kinders in Kaarkwaarve die nie mit ’n schoolbusje nae De Meije in Zurrikzêê mee mahhe, want ze wone ’n aolve kilometer te dichte bie schole. Douwers wille best an dat busje meebetaele, mâ de gemêênte zeit: zô bin de rehels noe êêmae. Dat kan’k best behriepe, mâ dan bin die rehels nie goed genocht, want ze motte d’r weze vô de burhers in nie vô de rehels of d’amtenaeren. Anpasse die rehels Roel, in zô rap mohelijk!

bron: Ons Eiland  30-09-2009