ENDRIK’S COLUMN

Bezunihe

n Stuitje elee èk â eschreve, dat r êête jaeren ankomme. Want bie de êêste de beste(?) bezunehieng – de beiaardier – stienge dr êêl vee maansen op ulder achterste bêênen in zè nog dr zin ekrehe ok. Mâ jao, noe kom t College mit de behrôôtieng in daer stae n tekort van vier ton op. Renden zeit, dat n dae nie vrolijk van kiekt. Maansenlieve, ik è mn eihe â s ofevrohe waer of wetouwer Wijnand wè vrolijk van zou kieke in ik kon t nie trek bedienke, mâ dit kank dan toch behriepe. Schrappe van êêl vee subsidies, dat is nie leutig, mâ ik bin t mit zn sêêns, t is wè nôôdzaekelijk in ik stae vô êêne keer êêmae achter (of vô) de wetouwer. Ie kon dr op wachte, daer kwaeme glieke de klaegzangen. Gin geld vô Centree. Peter Schotte zei trek: daer lehhe mn ons nie bie neer. Kiek, dat is mannentael. Daer ouw ik van, mâ wat gaet n noe doe? Daer bin ik êêl benieuwd nae. t Platform eilandelijke musea zâ n brief stiere naer de gemêênteraed. Ze kun beter n brief stiere naer sinterklaos, dan è ze misschien meer kans om wat te kriehen. Ik verwachte, dat de brandweer de raemen van de wetouwerkaemers van t gemêêntuus nat zâ spuite, want ze kriehe op Renisse gin nieuwe tankauto in aole brandweermannen stae trek in raefelihe pakken. t VVV zâ n protestmars orhanisere, want dr bin gin centen om de monementen te verlichten in de rolstoelers rieje mit bordjes: ons eise betere busokjes! In noe zâ dan toch eindelienge de raed mit de billen blôôt motte in de gemêênte gae besture. Want de raed is volhes zaahen nog aoltied de baes.
Ik è dr dofheloape jaeren nie vee van emorke, want ze waere êêl goed in vôôruut schuve in gin beslissiengen neme om mâ gin kiezers kwiet te raeken. Ok dat èk â s opemorke: kom raedsleden, vodder s n bitje! Ik gae dr noe â van zitte geniete, maansen. Misschien vaol Endrik wè van zn geloaf in gaet n s luustere naer de behrôôtiengsverhaederienge. Ik kan bienae nie wachte. Eindelienge dudelijkeid waer of de partijen stae.

bron: Ons Eiland  15-10-2009