ENDRIK’S COLUMN

Oliebollen

De Reisenaer Simon Gons mag z’n oliebollen in de fêêstmaend december nie verkoape waer of ’n dat zou wille. Even dienk je dan: wat bin dat noe toch vô raore fertuten van de gemêênte? Zô’n vint mot toch z’n brôôd kunne verdiene? Mâ â je even dûdienkt mot je toehee dat ’n ok nie overâ kan gae stae. Ik vinde ’t zaalf êêl lekker ruke op de kaarmisse, mâ ik mot ‘r toch nie an dienke d’n êêlen dag in die lucht te zitten.
Toch è’k noe zômâ ’n paer vraehen. Want wie eit noe bedocht waer of ’n wè mag verkoape? Was dat de gemêênteraed of enkelt ’t College of ’n amtenaer? In bin die plekken goed genocht vô ’n ondernemer om z’n lekkers te verkoapen? In as Simon bie ’n bepaeld bedrief kan gae stae, waerom mot ‘r dan zô nôôdig êêne van dat bedrief ok in die kraem d’r bie komme? Ok â eit dat bedrief die verhunnieng ekrehe (’t zâ wè ekocht motte weze), waerom zou Simon nie allêênig in die kraem kunne stae? ’t Zû wè wî uutwaarkiengen van uutwaarkiengen van reheltjes weze, mâ dat gae toch mien verstand te boven. De oliebollenbakker is weze praete mit wet’ouwer Verseput. Dae kâ je vast vee van zaahe, mâ nie dat ’t ’n oliekoeke is. Ie kon zô ’n lieste laete zie van plekken waer of je mit zô’n kraem wè zou mahhe stae, mâ daer kreeg Simon noe wî traenen van in z’n oahen.
Ik dienke, dat Simon ’t beste zaalf ’n lieste zou motte maeke van geschikte plekken in dan mot ’n netuurlijk ’n bitje bescheije weze in nie trek de meziektente in Zurrikzêê noeme. Want daer zou iedrendêên wè wille stae. Mâ dat liekent mien noe net ’n plekke waer of je niks zou motte zette.
Mit die lieste zou ’n dan nog ’s naer de wet’ouwer trug motte gae. Misschien komme ze d’r dan wè uut, want Ad ei â ervaerieng mit ’n frietkot bie Sêêskaarke in as ’n op kosten van de gemêênte gae ete schient dat ok nie meer as ’n bakje friet mit ’n kerkèt te wezen.
fertuten: streken.

bron: Ons Eiland  12-11-2009