ENDRIK’S COLUMN

Schôôn

n Stuitje elee bin d r overâ in Europa maansen op zondagmiddeg om drie ure in t waeter edoke. Want ze bin vô schôôn waeter in ze dochte dat t zou aalpe. Jao, t is leutihe reclame, mâ of t vee zâ aalpe? Ik dienke, dat t meer indruk zâ maeke, â je mî zn aolen in n mispit (mestput) gae duke, om de maansen dr op te wiezen, dat r nog aoltied n mis-perbleem is. In wat dienk je van t alcoolperbleem? Dêêlnaeme vô boven de 18, je kan kieze uut n duuk in n vat jenever of n viever mit bier.
Endrik zâ dr an gin êêne meedoe. Want ie gloaftr nie zô in. Beter is, wat of tr ier gebeurde: ze deeje de straetstêênen schôônmaeke mit n oahedrukspuit.
Ik gloave dat t beter waarkt as bevobbeld reclame mit aol die daehen die of aarhest an ophedrohe bin. Die bin dr de leste jaeren ok as n virus bie-hekomme. Vroeher ao je enkelt moederdag, de middenstand eitr vaoderdag bie bedocht, dr kwam Valentijnsdag in Dierendag, ’n Dag van de Verplehieng, de Dag van de Sikretaresse, in noe è mn dr â zôvee, dat je t nie kan bieouwe. In zaalfs weken: de Weke van t Brôôd, de Weke van de Smaek in gae zô mâ dû. In de belangrieke daehen ore verhete. Ik zitte â jaeren te wachten op de Dag van de Columnisten, mâ je mot nie gloave dat r êêne an dienkt om daemee te kommen.
De gemêênte is gek op reclame over schôône stranden in blauwe vlahhen. Ik e ôôre zaahe, dat onze ôôsterburen op internet kieke, waer of t’r ’n blauwe vlahhe is! Mâ ik dienke toch eihenlijk, dat de mêêste toeristen ’n kopje koffie wille, dat nie te diere is. In kiek, daer è m’n noe net ’n onderwaarp dat nie besproken ‘oort. Endrik ei dit jaer zaalf wî kunne ervaere, dat de horeca in Duitsland vee goekoaper is as ier.

Z’è ier op ’n verhaederienge zeven soorten rekreasie genoemd in ze bin noe net as die ezel, die of tussen twî baelen mit ‘ôôi leit in nie weet van waalken’n zâ ete. Totdat ’t ‘ôôi verdwene is!

bron: Ons Eiland  01-12-2009